دمعه وفاء
Admin
عدد المساهمات : 487
تاريخ التسجيل : 05/04/2013
العمر : 44
 | | موضوع: شهادة ياسمين البرماوى : شفت بعيني التحرش بالبنات .. اكتر من 39 حالة تحرش الأحد سبتمبر 01, 2013 6:59 pm | |
|
 لحد دلوقت 39 حالة اغتصاب جماعي في ميدان التحرير ومصر كلها في الشارع, انا كنت في الاتحادية وكانت في منتهى الامان اول ما وصلت التحرير او قبل ما اوصل حتي ادام مسرح قصر النيل شفت ميكروباص بيجري وحواليه موتسيكلات وناس بتجري وصوت صريخ بنت جوة معرفتش اعمل حاجه ومعرفش كانوا بينقذوها ولا بيخطفوها, بعد شوية شفت مجموعة قوة ضد التحرش بيجروا عشان يلحقوا واحدة تانية, الميدان اصبح غابة.
أولاً انا مش بقول كده عشان اخوف الناس انها تنزل بس ده واجب انا مش هشوف جريمة واسكت
ثانيا انا مش بتهم الثوار بدليل ان في باقي الميادين في ثوار برده وده مبيحصلش
ثالثا انا مبقولش ان احنا شعب زي الفل لأ احنا عندنا كارثة اسمها تحرش مسكوت عليها من سنين وانتوا في غنى اني اشرحلكوا الفرق بين التحرش الاجتماعي والتحرش السياسي
رابعاً الإشاعة اللي صدرت عني انهرده اني بتهم الثوار بالاعتداء عليا وبناء عليه مش هنزل الميدان خير دليل على انهم بيحاولوا بكل الطرق نشر الارهاب الجنسي منتهى التفاهة والغباء منهم لإني لا انا اللي بنزل الناس ولا انا اللي همنعهم انتوا يا عيني بتفلفصوا اوي كده ايه ضاقت بيكم الحيل يا مساكين
خامساَ لو قلنا ان الداخلية مكانتش تقدر تدخل الميدان قبل كده عشان تحمي اللي فيه ايه اللي مانعهم دلوقت؟؟؟؟؟؟؟؟؟؟؟؟؟؟؟؟ دول الناس لما بتشوفهم هم او الجيش بيهللوا ويتشعبطوا على المدرعات ويرقصوا
سادساً مجهود المجتمع المدني رائع وعظيم والناس دي فعلاً ابطال بيخاطروا بحياتهم عشان ينقذوا البنات, لكن مين هيحل اللغز ده ويحاسب المحرض الاساسي, مين يقدر يردع ويتحرى ويجيب البلطجية دول ويحبسهم او يعدمهم, احنا للأسف معندناش الاليات اللي تسمحلنا نقوم بالدور ده, والداخلية متقاعسة عن اداء دورها كل اللي عملوه قسم للدعم النفسي للمتحرش بهن يتكون من اربع ظابطات واكيد هم افشل من اي دكتورة في المراكز الحقوقية زائد ان دور الداخلية المفروض يكون انقاذ, محاسبة, ردع, وتحريات
المصيبة ان احنا بنستخف بجرايم التحرش والاغتصاب وبنعتبر السرقة والعاهة المستديمة اهم
المصيبة انها بيتقال عليها جرايم شرف مش جرايم جنائية ومخلة بشرف المعتدى عليه كمان مش الجاني
قتل النفس مش بس بالموت
بناء عليه انا عايزة اقدم بلاغ او معرفش ايه الصيغة شكوى محضر طلب على ورقة دمغة سموها زي ما تسموها بس الفكرة اني بطلب مقابلة وزير الداخلية لعرض الأمر عليه وسماع اسباب تقاعس الوزارة عن اداء وظيفتها مع التأكيد على موقفي الكارة والرافض والمستاء من الجيش والشرطة بس أنا مش عايزة ولا واحدة يحصلها كده تاني
اللي يقدر يساعدني في ده له جزيل الشكر ولو محدش يقدر او استخفيتوا بيا او بالموضوع او قلتوا عليا مجنونة وببالغ او ان ده مش وقته او حتى استنكرتوا على ثوريتي استعدادي للتعامل مع هذة الوزارة الفاسدة ميهمنيش وهروح الوزارة مع نفسي اعملهم مجنونة هناك لحد ما اقابلة ..... انا مش هسكت ومش هسيب بنت تانية يجرالها كده واللي مش عاجبة كلامي يا يقول حل تاني يا يخليه في حاله | |
|
الاثنين, يوليو 01, 2013 
Nahdet Masr 
